ഷുഗർകട്ട് എടുക്കണം എന്നാൽ മധുരം കാണുമ്പോൾ പിടിവിടും; ഒരാൾക്ക് ഒരു ദിവസം എത്ര മധുരം കഴിക്കാം

രാവിലെ മധുരമിട്ട് ഒരു കപ്പ് ചായ, ഉച്ച ഭക്ഷണം കഴിഞ്ഞ് ഒരു കഷണം മധുരം, വൈകുന്നേരം ചായയോ കാപ്പിയോ അല്ലെങ്കില്‍ ശീതളപാനീയമോ. അങ്ങനെ നമ്മുടെ ശരീരത്തില്‍ ഒരു ദിവസം എത്രമാത്രം മധുരം പ്രവേശിക്കുന്നുവെന്ന് നമുക്ക് തന്നെ അറിയില്ല. എന്നാല്‍ ഈ മധുരമൊക്കെ നമ്മുടെ ശരീരത്തിന് എപ്പോഴാണ് ദോഷകരമാകുന്നതെന്ന് നിങ്ങള്‍ എപ്പോഴെങ്കിലും ചിന്തിച്ചിട്ടുണ്ടോ? മധുരം ക്രമേണ നമ്മുടെ ശരീരത്തിന് വിഷമായി മാറും.

ഉയര്‍ന്ന അളവിലുള്ള പഞ്ചസാര ഉപയോഗം അമിതവണ്ണം, പ്രമേഹം, ഹൃദ്രോഗം എന്നിവയ്ക്ക് മാത്രമല്ല ചര്‍മ്മത്തില്‍ ചുളിവുകള്‍ക്കും അകാല വാര്‍ദ്ധക്യത്തിനുംവരെ കാരണമാകുമെന്ന് ഡോക്ടര്‍മാര്‍ പറയുന്നു. അതിനാല്‍ ഒരു ദിവസം കഴിക്കേണ്ട മധുരത്തിന്റെ അളവ് അറിയേണ്ടത് പ്രധാനമാണ്.

എത്രത്തോളം മധുരം കഴിക്കുന്നതാണ് സുരക്ഷിതം

റിപ്പോര്‍ട്ട് അനുസരിച്ച്, ആരോഗ്യ വിദഗ്ധരും WHO പോലുള്ള അന്താരാഷ്ട്ര സംഘടനകളും ഭക്ഷണപാനീയങ്ങളില്‍ നാം ഉപയോഗിക്കുന്ന മധുരം, ദിവസേന പരിമിതപ്പെടുത്തണമെന്ന് സമ്മതിക്കുന്നു. WHO യുടെ റിപ്പോര്‍ട്ടുകള്‍ അനുസരിച്ച് പഞ്ചസാരയുടെ അളവ് മൊത്തം കലോറിയുടെ 10 ശതമാനത്തില്‍ താഴെയായിരിക്കണം. കൂടാതെ അത് 5 ശതമാനമായി, അല്ലെങ്കില്‍ ഏകദേശം 25 ഗ്രാമായി (ഏകദേശം 6 ടീസ്പൂണ്‍) പരിമിതപ്പെടുത്തുന്നത് ഒപ്റ്റിമല്‍ ആരോഗ്യത്തിന് ഏറ്റവും ഗുണം ചെയ്യുമെന്ന് കണക്കാക്കപ്പെടുന്നു. ഈ അളവ് ശരീരത്തിന് സുരക്ഷിതമാണെന്ന് കണക്കാക്കപ്പെടുന്നു. കൂടാതെ പൊണ്ണത്തടി, പ്രമേഹം, ദന്ത പ്രശ്‌നങ്ങള്‍ എന്നിവയ്ക്കുള്ള സാധ്യത കുറയ്ക്കുന്നു.

സ്ത്രീകള്‍ക്കും പുരുഷന്മാര്‍ക്കും പ്രത്യേക പരിധികള്‍

മധുരം കഴിക്കുന്നതുമായി ബന്ധപ്പെട്ട് വിവിധ ആരോഗ്യ സംഘടനകള്‍ പുരുഷന്മാര്‍ക്കും സ്ത്രീകള്‍ക്കും വ്യത്യസ്ത പരിധികള്‍ നിശ്ചയിച്ചിട്ടുണ്ട്. സാധാരണയായി, സ്ത്രീകള്‍ക്ക് ഏകദേശം 25 ഗ്രാമും പുരുഷന്മാര്‍ക്ക് 30 മുതല്‍ 36 ഗ്രാം വരെയും ഉചിതമാണെന്ന് കണക്കാക്കുന്നു. ഇന്ത്യക്കാര്‍ക്ക് പ്രതിദിനം 20 മുതല്‍ 25 ഗ്രാം വരെ മധുരം മതിയെന്നും ചില റിപ്പോര്‍ട്ടുകള്‍ സൂചിപ്പിക്കുന്നു. ഈ അളവില്‍ കൂടുന്നത് ശരീരത്തിലെ കൊഴുപ്പ് വര്‍ദ്ധിപ്പിക്കുകയും ഹൃദയം, കരള്‍, രക്തത്തിലെ പഞ്ചസാര സംബന്ധമായ രോഗങ്ങള്‍ക്കുള്ള സാധ്യത വര്‍ദ്ധിപ്പിക്കുകയും ചെയ്യും.

മറഞ്ഞിരിക്കുന്ന പഞ്ചസാരയെ സൂക്ഷിക്കുക

മധുരപലഹാരങ്ങളിലും പഞ്ചസാരയിലും മാത്രമല്ല പായ്ക്ക് ചെയ്ത ഭക്ഷണങ്ങളിലും ശീതളപാനീയങ്ങളിലും ജ്യൂസുകളിലും ലഘുഭക്ഷണങ്ങളിലും ഉയര്‍ന്ന അളവില്‍ പഞ്ചസാര അടങ്ങിയിട്ടുണ്ടെന്ന കാര്യം ശ്രദ്ധിക്കേണ്ടതാണ്. ഒരു സോഫ്റ്റ് ഡ്രിങ്കില്‍ പലപ്പോഴും ശുപാര്‍ശ ചെയ്യുന്ന ദൈനംദിന ഉപഭോഗത്തേക്കാള്‍ കൂടുതല്‍ പഞ്ചസാര അടങ്ങിയിരിക്കാം. മിതമായ അളവില്‍ പഞ്ചസാര കഴിക്കുന്നതും സംസ്‌കരിച്ച ഭക്ഷണങ്ങള്‍ ഒഴിവാക്കുന്നതും നിരവധി ഗുരുതരമായ രോഗങ്ങളെ തടയാന്‍ സഹായിക്കുമെന്ന് വിദഗ്ദ്ധര്‍ വിശ്വസിക്കുന്നു.

Content Highlights : Do you know how much sugar a person can eat in a day? There are different limits for women and men.